चल दिस ते जगूया
चल दिस ते जगूया
बालपणात शिरुया
पुन्हा होऊन लहानगे
थोडं ऊनाड फिरुया
फुलपाखरु धरुया
बैल मातीचा करुया
झोका बांधुन झाडाला
उंच हिंदोळा घेऊया
काही वेगळं करुया
पीकं पैशाचं पेरुया
आई नसतांना घरी
थोडी साखर चोरुया
चल बांधानं फिरुया
सारं शिवारं घेरुया
पात तोडूनं कांद्याची
त्याच्या पिपाण्या करुया
किल्ला वाळूचा करुया
उन्हातान्हात फिरुया
पानं तोडून एरंडाची
माथी सावली धरुया
क्षण निसटले जे होते
पुन्हा क्षण ते धरुया
नाही सर बालपणीची
चल प्रयास करुया
© शिवा चौधरी
जामनेर,जळगांव
कोई टिप्पणी नहीं:
एक टिप्पणी भेजें