1) गाठीभेटी
नकळत भेटले तुला अन्
प्रेमात तुझ्या रे पडले,
ऋणानुबंध जिवनाचे या
गाठीभेटी तून जुळले…
शब्दांच्या माधुर्यानेच कसे
स्नेही आकर्षित होती,
मग शब्दांच्या पावसात तेही
चिंबचिंब न्हाती,
शब्दांच्या खेळातुनच आज
मनी काव्य हे उमळले,
ऋणानुबंध जिवनाचे या
गाठीभेटी तून जुळले…
सप्तरंगी रंगून निळे नभ ही
रंगीत मग होती,
इंद्रधनुच्या दुव्या मधला इथं
रवीकर का विसरती,
लुभावणाऱ्या इंद्रधनुचे दर्शन
रवि किरणांमुळे घडले,
ऋणानुबंध जिवनाचे या
गाठीभेटी तून जुळले…
पुष्प परागांची बदली भवऱ्यासवे
मक्षिकाही करती,
मधुर फळ चाखणारे का त्या
गाठीभेटी विसरती,
सृष्टिच्या त्या किमयेचे मज
मर्म न अजून कळले,
ऋणानुबंध जिवनाचे या
गाठीभेटी तून जुळले…
अथांग सागराच्या मधोमध ही
नृत्य लिलया त्या करती,
किनाऱ्याच्या पालवीस त्या लाटा
अवचित भेटुन जाति,
बंध रेशमी धाग्यांचे सारे
नकळतच होते वळले,
ऋणानुबंध जिवनाचे या
गाठीभेटी तून जुळले…
गगनी उडणाऱ्या मातेस साद घाली
घरट्यातला पारवा,
जळत्या मनाला सुखावून जाई
भेटीतला गारवा,
विना भरारीचे जगी या
कुणा न काही मिळले,
ऋणानुबंध जिवनाचे या
गाठीभेटी तून जुळले…
©शिवा चौधरी(कळमसरेकर)
जामनेर,जळगांव
2)
गाठीभेटी
भेटता स्नेही सारे
शब्दातुन मने उमडली,
तव ऋणानुबंधने
गाठीभेटीतून जुळली.
शब्दांचा गोडवा मुरून आला,
शब्द रसात चिंब चिंब न्हाला,
शब्दांसवे स्नेहचव हि कळली,
तव ऋणानुबंधने……
सप्तरंगी साजते निळ्या नभी,
मनमोही इंद्रधनुची छबी
रवि किरणे स्पटीकास भिडली,
तव ऋणानुबंधने……
पराग कणांची किमया न्यारी,
मधुर फळांची चवच भारी,
किटकांची भूल का ? जिवा पडली,
तव ऋणानुबंधने……
उसळती लाटा संथ सागरी,
येऊन भिडती किनाऱ्यावरी,
बंधने तयाची कशी आवळली,
तव ऋणानुबंधने……
पिलांसाठी मादा उडे आकाशी,
सांजवेळी येई घरट्या पाशी,
भरारी विन कुणा पै न मिळली,
तव ऋणानुबंधने……
©शिवा चौधरी(कळमसरेकर)
जामनेर,जळगांव
