(१ ते ११ अक्षरी
एक नवा प्रयोग )
मी
स्त्री
तु
श्री
प्रेम
माझं
तसं
तुझं
मी दिवा
तु वात
मी सर्प
तु कात
मी धवल
तु सावळा
मी स्वराज्य
तु मावळा
मी तुझे चित्र
तु माझा रंग
मी तुझी काया
तु अंतरंग
मी तुझी कीरण
तु माझा प्रकाश
मी धुंद पाखरू
तु निळे आकाश
मी तुझे रे शहाळे
तु शहाळाचे पाणी
मी तुझी रे रसना
तु माझी मिष्ठ वाणी
ओवाळून जीव माझा
अर्पेन तुज साजना
मी सांभाळेन सख्या रे
जन्मातरी च्या बंधना
मी मुक्त मोरणी तुझी रे
तु मोर बेधुंद नाचरा
मी रे ऋतू तुझा गुलाबी
तू वारा त्यातला बॊचरा
वल्हवीली मी नौका प्रेमाची
जरी वादळ वारे वाहीली
अठरा वसंता पासून मी
वाट तुझी रे किती पाहीली
ओरडून मी सांगेन जगाला
प्रीती तुझ्यावर अशी जडली
तुझ्याच मिलनाने का? सख्या रे
माझी कोमल काया गंधाळली .
© शिवा चौधरी(कळमसरेकर)
जामनेर, जळगांव
कोई टिप्पणी नहीं:
एक टिप्पणी भेजें