हृदय स्पंदने
आपापल्या परी जन
जाता कराया सुलटे
प्रारब्धाचे भोग त्याचे
येथे होतिया उलटे………
खिचडीच्या व्यापा पायी
मर मरली मास्तर
विद्यार्थ्याच्या पोटामंधी
भुक तोडते लक्तरं………
जीव ओतुन मातीत
शेत पेरी शेतकरी
हाती धुपाटणे त्याच्या
तेला तुपात व्यापारि………
कोकिळेच्या जागी इथं
गाती घुबडच गाणी
वडचणीला चालले
आज आढ्याचे ते पाणी………
सासु सुनांचं भांडण
जन्मा जन्माचीच कथा
दोन जात्यात पिसतो
काय सांगावी ती व्यथा………
मुलाच्या हव्यासा पायी
किती गर्भपात होती
उद्या लेकरंच त्यासी
वृद्धाश्रम तो दावती………
एकेकाचे मन् येथे
बघा करती रुंदणे
बघुनिया खेळ सारा
स्तब्ध हृदय स्पंदने………
©शिवा चौधरी
जामनेर,जळगांव
कोई टिप्पणी नहीं:
एक टिप्पणी भेजें