कन्या

कन्या(हिरकणी)

तुझी लागता चाहूल
माझी खुलली गो कळी,
घरा येईल गो माझ्या
एक सोनपरी बाळी………

धडपडून गो तेव्हा
झाले स्वप्न गो साकार,
मज उदरी गो तुनी
पोरी घेतला आकार………

बाबा नाचला गो किती
जेव्हा जन्मास तु आली,
म्हणे गोड हिरकणी
राणि तू गो मज दिली………

घरभर तु गो पोरी
किती नाचली हिंडली,
भावासवे तु गो किती
खोटी खोटीच भांडली………

तुझ्या गुणानं गो कसा
पोरी लावला तु लळा,
तु गो जाशिल सासरी
सुना पडेल ह्यो मळा………

पण दुनियेची रित
तुका जावोच लागेल,
बाबा सवे पोरी माझ्या
धार डोळ्याशी लागेल………

तुझ्या जाण्याने गो बाबा
बघ होईल निराश,
तुझ्या सुखासाठी पोरी
सदा धरितो गो कास………

©शिवा चौधरी
    जामनेर,जळगांव