विरह गाणे

चंद्र ओंजळीत

मला वाटले,
चंद्र ओंजळीत आला.
तुझ्या असण्याचा,
मला आभास झाला.

खिडकित बसूनी;
मी चांदण्यात न्हाते,
तुझ्या आठवांचे;
सख्या गीत गाते,
गीतात माझ्या;
तू उतरुन आला………

या शुभ्र राती;
तू ये ना एकदाच,
ये ना जरा तू;
माझ्या कवेत,
कुशित माझ्या;
तू अबोल झाला………

मनाने माझ्या;
झुगारला पदर,
तुझ्या आठवांचा;
अंतरी व्हावा गजर,
गजराचा ध्वनी ;
मग बेफाम झाला………

निजतांना जेव्हा;
काजवे गीत गाती,
चंद्राचे कवळसे ;
मज छेडून जाती,
कवळसा एक,
हळू आत आला………

भासातून  एकदा;
तू ये वास्तवात,
मनाला नको रे;
टाकू विस्तवात,
निखारा दिलाचा,
तडपून लाल झाला………

मला वाटले,
चंद्र ओंजळीत आला.
तुझ्या असण्याचा,
मला आभास झाला.

शिवा चौधरी
जामनेर,जळगांव