सपान
माय मह्यी रखूमाई
बाप विठू गं सावळा
भरल्या डोयात दिसतो
हिरव्या पिकाचा सोहळा
सारी हयात खपली
तरी वल्याच जखमा
बापापाठी फिरे माय
अनवाणी गं रखमा
दानं देईन ही माती
थोडा धिर जरा धरु
म्हणे बाप कारभारने
चल मेहनत करु
गेला अनवाणी विठू
पुंडलिकाच्या भेटीस
केला विटेवर उभा
धरला त्याला बी येठीस
देव असो वा मानव
वाट पहावी लागते
दाणं भरता कणीसातं
चाहूल पाखरां लागते
दाणा दाणा कोरून खायी
पाखरू गं रानामंदी
नाश होऊन बी पिकाचा
खुशी त्येच्या मनामंदी
बाप सादा भोळा मह्या
समजे साऱ्यांचा रूजिकं
त्येचा दिल्लदार पणा
शिवारी डोलवितो पिकं
पिक डोले वाऱ्यावरी
बाप खुशित नाचतो
भरल्या डोयामंदी कसा
हिरवं सपान येचतो
नको ढिग जोंधळ्याचा
बस मिळावी भाकरी
मह्या बापाचं सपान
फुलू दे रे यंदातरी
शिवा चौधरी
जामनेर,जळगांव
कोई टिप्पणी नहीं:
एक टिप्पणी भेजें