जुळेल का माझं ही ?
जुळेल का माझं ही
म्हणून स्थळ बघायला गेलो
अटी बघून मुलीच्या
मेटाकुटीला आलो
पहिला प्रश्न मुलीचा
शिकलात किती सांगा
माझ्या मागं मुलांच्या
लागल्याय म्हणे रांगा
तुमची योग्यता बघूनच
मी तुम्हाला वरणार आहे
हुंडा जर का मागितला तर
इथंच धरून मारणार आहे
चकार शब्द तोंडावाटून
बाहेर माझ्या पडेना
काय उत्तर द्यावे तिला
काहीच मला कळेना
दुसरा प्रश्न तत्काळ
मग तिने मला केला
नोकरी तुमची सरकारी
कि प्रायव्हेट आहे बोला
प्रायव्हेट असेल नोकरी जरी
पर्मनंट असायला हवेत
मैत्रिणींच्या नवऱ्यांमध्ये
तुम्ही उठून दिसायला हवेत
पुढचा प्रश्न तिचा होता
पगार किती मिळतो
कपात कुपात करून सांगा
हातात किती पडतो
पगार माझा ऐकून ती
मला खूश जरा वाटली
पण पुढच्या प्रश्नाची भिती
माझ्या मनात होती दाटली
शेवटचा प्रश्न तिने मला
केला लयच भारी
माझ्या साठी झोपाळा
म्हणे बांधाल का हो दारी
पुढे म्हणाली अंगणात
चारचाकी असावी राव
सात बाऱ्यावर शेती थोडी
तुमच्या दिसावी राव
नक्षत्रागत पोर माझी
तिला रडवायचं नाही
शाॕपींग साठी कधी
तिला अडवायचं नाही
शाकाहारी पोर माझी
राव तिला बाटवू नका
बांधा वरती पोर नाजूक
चुकून पाठवू नका
ऐकता ऐकताच सारं
तापला होता पारा
संतापाने मी ही मग
बोललो भराभरा
शेती कशाला हवीय
जर शेतात जायला नको
तुझ्या आई-बाबांना सन्मान
माझे घरात रहायला नको
पाऊस नाही पाणी नाही
शेतात काय रूजवणार
सात बाऱ्यावर मग काय
कोरडीच शान गाजवणार
अहो उद्याच घेतो शेती
नोकरी देऊ का सोडून
हुंडा नकोच नको मला
फक्त पोरगी द्या धाडून
कळतो तुमचा अट्टाहास
कारण पोरी झाल्याय कमी
काळीजं बनताय दगडं
अन् माणसं होताय ममी
शेतकऱ्याचा पोरगा मी
मामा हुंडा मुळीच घेणार नाही
कळलीय किंमत मुलीची
गर्भात तिला मारणार नाही .
कोई टिप्पणी नहीं:
एक टिप्पणी भेजें